Eins og þeir þekkja sem á annað borð hafa fylgst með myndlistarlífinu á Íslandi hefur gengið illa að halda metnaðarfullum einkareknum galleríum gangandi. Hvort sem það hefur verið reynt í samvinnu listamanna eða af öðrum einstaklingum, hafa þessi gallerí alla jafna lognast útaf eftir nokkur ár. Sævari Karli hefur þó tekist vel að halda sinni starfsemi gangandi í litlu en fallegu hornherbergi í gömlu versluninni. Nú hefur hann stigið skrefið til fulls og lagt sérhannaðan sal undir liststarfsemi sína.

art.is er Sævari Karli til ráðgjafar um val á sýningum í þennan glæsilega nýja sal. Það er Jón Óskar sem ríður á vaðið en í framhaldi af sýningu hans koma aðrir og hefur sýningarhaldið þegar verið skipulagt fram á haustið. Fréttir verða sagðar af því jafnóðum hér á art.is vefnum.

Meðal annars mun Gallerí Sævars Karls taka þátt í Sjónþingum sem nú hafa verið endurvakin í samstarfi Gerðubergs og art.is, en þau hafa verið sterkur liður í myndlistarlífinu undanfarin ár. Sjónþingin munu verða snar þáttur í starfi þessara þriggja aðstandenda – Gerðubergs, Sævars Karls og art.is – á árinu sem er að hefjast.