Ragnheiður Jónsdóttir

MÖTUN, ÓLYST, ÍTROÐSLA

Matskeið volgt lýsi.
Hnausþykkur, kekkjóttur, hálfkaldur,
saltlítill og seigur hafragrautur.

Eina skeið fyrir mömmu

Eina skeið fyrir mömmu.
Eina fyrir pabba.
Eina fyrir litlu systur.
Eina fyrir litla barnið
í maganum á henni mömmu.

Eina fyrir bra bra.
Eina fyrir afa, sem er uppi
hjá Guði og englunum.
Eina fyrir ömmu.
Eina fyrir Sigga frænda son hennar ömmu.
Eina fyrir Olla frænda, sem hann afi átti
með henni Gauju í austurbænum.
Eina fyrir ho ho.

Eina fyrir Kalla litla son hennar Dóru
dóttur hennar Beggu systur hans afa.
Eina fyrir me me.
Eina fyrir Dúnu litlu dóttur hennar Dísu
hálfsystur hennar Siggu, sem hann afi átti
með henni Gunnu í vesturbænum.

Láttu ekki svona barn, þetta er svo hollt.

Eina skeið fyrir mjá mjá.
Eina skeið fyrir Dúu litlu dóttur hennar Dæju
hálfsystur hennar Siggu dóttur hennar Beggu
systur hans afa.
Eina fyrir bí bí.
Eina fyrir Siffa frænda son hennar Lóu
dóttur hennar Soffíu systur hans afa.

Þú ætlar þó ekki að spúa þessu öllu aftur á diskinn?

Elskan mín góða – ætlarðu aldrei að verða stór?